DOSTLUK DÖREDIJILIGI
Paýtagtymyz Aşgabat şäherinde ýerleşýän Türkmen döwlet gurjak teatrynda Türkmenistanyň we Eýran Yslam Respublikasynyň çagalarynyň dostluk hepdeligi dowam edýär. Bu dostlukly halkara dabarasyna Aşgabat şäher medeniýet müdirliginiň 2-nji çagalar çeperçilik mekdebiniň mugallymlary we şekillendiriş sungatyna höwesli ýaşajyk suratkeş okuwçylarymyz hem işjeň gatnaşdylar. Ol ýerde doganlyk ýurdumyz Eýran Yslam Respublikasyndan gelen döredijilik ussatlary milli medeniýetleri, döredijilikleri bilen bagly gyzykly sergileri hem-de ajaýyp jadylaýjy gurjak sahnasyny görkezdiler.
Bu ýatdan çykmajak dabaraly doganlyk döredijilik pursatlaryna işjeň gatnaşan 2-nji çagalar çeperçilik mekdebiniň zehinli okuwçy gyzjagazlary uly höwes bilen bar bolan ukyp başarnyklaryny görkezdiler. Ýagny doganlyk ýurdumyzdan gelen ussatlaryň beren ýumuşlaryny diýseň ezberlik bilen ýerine ýetirdiler. 2-nji çagalar çeperçilik mekdebimiziň göreldeli okuwçy gyzjagazlaryna berlen ýumuş el işleri bilen bagly boldy. Dürli reňkli ýüplükleriň, reňkli mata böleklerinden ýerine ýetiren ýumuşlary myhmanlarymyzda uly täsirleri galdyrdylar.
Olar biziň ýaşlarymyzyň çaga kalplaryndan döreden her bir eserlerine ýokary baha berdiler. Ýaşlarymyz öz gezeklerinde ýerine ýetiren ýumuşlarynda milli nagyşlarymyzy ulanmak bilen täsin gözellikleri döretdiler. Şeýle-de Eýran Yslam Respublikasyndan gelen döredijilik ussatlarynyň ýörite öz milli halk ertekilerinden milli lybasly gurjaklaryň çykyş etmeklerinde sahna eserleri hem görkezildi. Bu ajaýyp halkara dabarasy ýaşlarymyzda hem-de mugallymlarymyzda özüniň uly täsirini galdyrdy, ýakymly ýatlamalary döretdi.
Biziň ýurdumyz Garaşsyz döwlet. Eziz Watanymyz Bitarap döwlet. Sebitde asudalygyň, parahatçylygyň, baky bagtyýarlygyň mekany hökmünde tanalýan mähriban Diýarymyzyň goýnunda, Türkmen halkynyň Milli Lideri Gahryman Arkadagymyzyň, Hormatly Prezidentimiz Arkadagly Gahryman Serdarymyzyň parasatly ýolbaşçylyklarynda bolelin durmuşda ýaşaýandygymyza, zähmet çekýändigimize buýsanýas. Goý Türkmen halkynyň Milli Lideri Gahryman Arkadagymyzyň, Hormatly Prezidentimiz Arkadagly Gahryman Serdarymyzyň janlary sag bolsun, ömürleri uzak bolsun.
