Hoş geldiň, Täze ýyl, salam, Täze ýyl!
Berkarar döwletiň täze eýýamynyň Galkynyşy döwründe Arkadagly Gahryman Serdarymyzyň parasatly baştutanlygynda dünýä medeniýetiniň genji-hazynasyna goşulan taryhy-medeni gymmatlyklarymyzy öwrenmekde we gorap saklamakda, ösüp gelýän ýaş nesle ýetirmekde asyrlara barabar işler durmuşa geçirilýär. Arkadagly Gahryman Serdarymyzyň taýsyz tagallalary netijesinde Täze ýyl baýramçylygy mynasybetli ýurdumyzyň dürli künjeklerine aýdym-sazly baýramçylyk çärelerini ýokary derejede geçirmek üçin ähli şertler döredilýär. Ýene-de sanlyja günlerden bagtyýar halkymyz agzybirlikde uly şatlyk-şowhun, dabara bilen täze – 2025-nji ýyly garşylar. Häzirki wagtda ýurdumyzyň ähli welaýatlarynda, paýtagtymyzda we Arkadag şäherinde baýramçylyk şatlygy dowam edýär. Aşgabat şäher medeniýet müdirliginiň Gypjak medeniýet öýiniň gatnaşmagynda, Sahy Jepbarow adyndaky Arkadag şäher ýörite sungat mekdebinde Täze ýyl baýramçylygy mynasybetli “Hoş geldiň, Täze ýyl, salam, Täze ýyl!” atly baýramçylyk dabarasy geçirildi.
Çäräniň dowamynda, tamamlanyp barýan 2024-nji ýyl ähli halkymyz, eziz Watanymyz üçin taryhy wakalara, ýatda galyjy pursatlara, ajaýyp üstünliklere baý ýyllaryň biri boldy. “Pähim-paýhas ummany Magtymguly Pyragy” ýyly diýen şygar astynda geçýän ýylda Arkadagly Gahryman Serdarymyzyň parasatly baştutanlygynda ýurdumyzyň gazanan üstünlikleriniň, ýeten belent sepgitleriniň barmak basyp sanardan has köpdügi tutuş ýylyň jemlerinden hem aýdyň duýulýar. Berkarar döwletiň täze eýýamynyň Galkynyşy döwründe, şeýle okgunly öňegidişlikleriň, ösüşleriň we özgerişleriň Täze – 2025-nji ýylda hem batly depginler bilen dowam etjekdigi halkymyzyň ýürek buýsanjyny goşalandyrýar diýip çärä gatnaşyjylar bellediler.
Çäräniň ahyrynda, Türkmen halkynyň Milli Lideri Gahryman Arkadagymyzy, Arkadagly Gahryman Serdarymyzy, ähli türkmen halkymyzy ýetip gelýän Täze ýyl baýramy bilen tüýs ýürekden gutlaýarys! Goý, Täze ýyl ähli halkymyz üçin rysgal-bereketli, düşümli ýyllaryň biri bolsun! Gahryman Arkadagymyzyň, Arkadagly Gahryman Serdarymyzyň belent başlary aman, ömürleri uzak, il-halkyň bagtly durmuşy ugrundaky döwletli işleri mydama rowaç bolsun! diýip çärä gatnaşyjylar aýtdylar.
